Նախագահ Սարգսեան ըդնունեց Եւրոպական Միութեան յատուկ ներկայացուցիչ` Հերպըրթ Զալպերը։
Հայաստանի նախագահ Սերժ Սարգսեան երէկ ընդունեց շրջանային այցելութեամբ Հայաստան գտնուող
Հարաւային Կովկասի եւ Վրաստանի ճգնաժամի հարցերով Եւրոպական Միութեան յատուկ ներկայացուցիչ
Հերպըրթ Զալպերը: Ըստ նախագահի մամլոյ գրասենեակին, հանդիպումին ընթացքին Հայաստանի
Հանրապետութեան նախագահը եւ Եւրոպական Միութեան յատուկ ներկայացուցիչը անդրադարձան Հայաստան-Եւրոպական
Միութեան յարաբերութիւններուն եւ համագործակցութեան: Զրուցակիցները միտքեր փոխանակեցին
շրջանային խնդիրներու եւ մարտահրաւէրներու, Լեռնային Ղարաբաղի տագնապի խաղաղ լուծման
բանակցային հոլովոյթին վերաբերեալ: Հանրապետութեան նախագահը բարձր գնահատեց, որ Եւրոպական
Միութիւնը տարբեր մակարդակներով իր աջակցութիւնը կը յայտնէ ԵԱՀԿ-ի Մինսքի խմբակի համանախագահներու
միջնորդութեամբ տագնապի խաղաղ եւ միջազգային սկզբունքներու հիման վրայ լուծման: Սերժ
Սարգսեան վերահաստատեց Հայաստանի դիրքորոշումը, ըստ որուն, Հայաստան Լեռնային Ղարաբաղի
հիմնահարցի խաղաղ լուծումը կը տեսնէ բացառապէս խաղաղ միջոցներով, ԵԱՀԿ-ի Մինսքի խմբակի
համանախագահողներու ձեւաչափով ընթացող բանակցութիւններուն շրջագիծին մէջ: Մինսքի խմբակը
առաջարկեց սկզբունքներ, որոնք, Սերժ Սարգսեանի համոզումով, կրնան տագնապի լուծման առանցք
դառնալ: Նախագահը նշեց, որ, ցաւօք, Ազրպէյճան չ՛ընդունիր այդ սկզբունքները, թէեւ կը յայտարարէ
հակառակը: Նախագահ Սերժ Սարգսեանի համաձայն, այդ իսկ պատճառով Ազրպէյճանը սադրանքներ
կը հրահրէ եւ կը սրէ լարուածութիւնը շփման գիծին վրայ, մշտապէս մերժելով վստահութեան
ամրապնդման ուղղուած միջոցառումներուն իրականացումը: Հանրապետութեան նախագահը ընդգծեց,
որ հարցին լուծումը պէտք է տան Հայաստանը, Ազրպէյճանը եւ Լեռնային Ղարաբաղը, Մինսքի խմբակը
այդ հոլովոյթին մէջ ընդամէնը միջնորդ է, որ իր լիազօրութիւններուն ծիրին մէջ կ՛ընէ կարելին: